Weekblad voor Salland

Ik hebbe mie op disse plekke al een paar kear uut eloaten oaver de Bonuskaarte. AH antwoarden zelfs met een officiële breeve. D’r stund niks in, mar det is ok niet zo vremd, want doar wördt det soart brievenbeantwoarders ok speciaal vöar op’eleid. Mar zie luustert wel. Want zie bint bie AH hard op zuuk noar alternatieven. De Smurfen. Det is het alternatief. In de Volkskraante leuten ze d’r een gelearden oaver an het woard. Iene die vermoedelijk mear Denne van Knöldert least dan echte studieboeken, want de man preut mie behoarlijk noa. Die Bonuskaarte, det is niet een dingegie woar meansen extra vöar noar de winkel komt. Zie koopt de kortingdingeties en dan is het kloar. Is het product eans aans goedkoper, koch het volk het doar. Gin klantenbinding dus. Woar meansen wél vöar komt is iets woar ie wat an hebt, of woarvan ie denkt det ie d’r wat an hebt. Nem de Wuppies. Doar had ie tenminsen wat an. Ie konn ‘m vöar het raam zetten, op de computer, op oe fietshelm… heel zinnig ollemoal. En noe de Smurfen wear. Net woar de familie op zat te wachten. De wichter brult d’r ömme bie de kassa, vöar as ze de zeldzame Grote Smurf (rooie mutse) wear niet kreeng. Olders leaft met, want zie keken zelf ok noar de Smurfen. In die logica verder goand, zult de Teletubbies oaver een joar of tiene ok een döarsloand succes wönn. Op Marktplaats.nl is een leamdige handel in Smurfen ontstoane. As een soart van Gargamel probeart verzamelaars Smurfen te vangen en verder te verkopen. Vöar gin middel deinze wie terugge. Zie kost een euro per stuk en bie tiene krieg ie twee kwarties korting. Asof wie op de slavenmarkt van Rome stoat. Terugge noar de Albert Heijn. GfK is een onderzuuksbureau. En die kunt het dus weten. De Bonuskaart leidt niet töt loyaliteit. De Smurfen wel. Bewies hemm? Het blik det d’r iniens völle mear gezinnen noar AH goat. Dan heb ie het spel op de waang. De vrouw vöar de gewone bosschoppen. De wichter vöar het snoepgoed en de frisdrank. De man met het bankpassie in ‘n tuk, sikkenöarig achter de steeds mar voller rakende winkelwaang… Twee procent mear gezinnen, det is 50 duzend gezinnen. 50.000 Kear twee wichter die mekare opneijt. 25.000 Kear een klap an de kop. Mar ok 100.000 kear iets kopen öm de gemoederen te sussen. Wat zal A.H. Gargamel een lol hemm. Denne van Knöldert