De Peperbus

Soms wörren mensen wel ies met dieren vergeleken en meestentied niet echt positief. Der bint niet weinig völle uutdrukkingen te bedenken en a-j ze ienmaol begint op te skrieven kump ter gien ende an.
Miskien is ’t wel öördig disse dierenuutdrukkingen met jullie te delen?
Zo ku-j bi’jveurbeeld met de vergelieking van een värken meerdere woorden gebruken. Maer of ’t now aover een värken giet of aover een ander biest, gao der ies effen veur zitten. Miskien kom ie zelf ook nog met een paer goeien.
Umme wat uut te drukken beginnen wi’j vaeke met: ij is zo… as een… Ieronder vin ie een antal veurbeelden.

Zo doof as een kwärtel, zo mak as een lämmegien/skaop, zo rood as een kreefte, zo blind as een molle/peerd, zo wiek as een mossel, zo stille as een moes, zo dood as een piere, zo koppig/dom as een ezel, zo dom as een ganze, zo fris as een oene, zo ziek/muu as een ond, zo moedig as een leeuwe, zo ieverig as mieren, zo stärk/dikke as een bere, zo trage as een slakke, zo niedig as een spinne, zo verliefd as een törteldoeve, zo dom as een achterend van een värken/koe, zo därtel as een veulen, zo gezond as een vis, zo vri’j as een vaogel, zo bange as een wezel/aze, zo beroerd as een katte/ond, zo stom as een rund/koe, zo ärm as een (kärk)rotte, zo dichte/geslöten as een oester, zo glad as een palink in een emmer snot, zo glad as een ale, zo voel/lui as een värken, zo trots as een pauwe, zo stärk as een peerd, zo slim/sluw as een vos, zo zat as een ape, zo dronken as een oele, zo stoned as een genale, zo gries as een doeve, zo vlugge as een vlo, zo kaal as een luus, zo kold as een kikker.
IJ löp as een kiefte/azewindond, ij stinkt as een otter/bunzing, ij ef een gezichte as van een oorwörm, ij is ’t zwärte skaop, ij stèèlt as een rave, ij bloed as een rund, ij is ’t nösien van de zalm, ij wärkt as een peerd, ij ef een ge-eugen as van een olifant, ij zit gevangen as een erink in een tonne, ij bèèft as een juffersuntien, ij zut gien ond/kippe, ij löp as een stotes-ane, ij pröt as een kippe zonder kop, ij ef onger as een peerd, ij skreeuwt as een mager värken/speenvärken, zie zitten as sadienties in een blikkien, ’t is ter zo vol as een pöttien met pieren, ’t is een draak van een mense, ’t is net een blind peerd.

Netuurlijk e-j ook uutdrukkingen wöörbi’j gien biesten wörren enuumd maer bi’jveurbeeld veurwärpen. Dan wört ’t: zo krom as een oepel, zo ärd as een stien/bikkel, zo… as een…
Pe beer maer ies en skrief ze op. ’t Is een mooi tiedverdrief met dit slechte weer.
Succes ter met!
Minke Kraijer